De Poopst Franziskus huet um Sonndeg Mëtteg, 1. September 2019, nom Angelus, d’Ernennung vun 13 neie Kardineel annoncéiert, ënnert hinnen eisen Äerzbëschof Jean-Claude Hollerich. De Konsistoire war e Samschdeg, 5. Oktober 2019, virum Optakt vun der Amazonas-Synod. 

An enger éischter Reaktioun fir cathol.lu huet den Äerzbëschof sech ganz iwwerrascht gewisen iwwer dës Ernennung, mat där hien iwwerhaapt net gerechent hat. An der Vakanz a Portugal krut hien no der Sonndesmass eng Partie Gléckwënschmessagen an der Suite vun der Annonce vum Poopst Franziskus. De Mgr Hollerich wëll dëst neit Amt an aller Bescheidenheet ugoen a sech nach méi asetze fir déi Sujeten, déi him an der Kierch wichteg sinn, notamment Europa, d’Flüchtlingskris an de Klimaschutz. Bei der Ernennung huet den Engagement vum Äerzbëschof um Niveau vun der EU sécher och eng Roll gespillt, huet de Poopst dach eng ganz héich Opinioun vun Europa. Hei muss d’Kierch wierken, wann et ëm Fridden an Ëmweltschutz geet, an do ass Europa gefuerdert, betount den Äerzbëschof. D’Nominatioun zum Kardinol ass an deem Sënn eng Hëllef bei der Aarbecht als Comece-President a mécht d’Dieren op. “Ech sinn awer och virun allem frou fir d’ganz Lëtzebuerger Kierch”, sou den Äerzbëschof Jean-Claude Hollerich, dee sech iwwer di ganz vill Messagen a Gratulatiounen erfreet gewisen huet, dorënner Gléckwënsch vun der groussherzoglecher Koppel.